Jarðskjálfti að stærð sjö reið yfir í gær kl. 18.46 að staðartíma á Lombok eyju í Indónesíu. Að minnsta kosti 82 eru látnir, mörg hundruð slasaðir og eignatjón er gífurlegt.

Vinkonurnar Margrét Helgadóttir og Katrín Ingibjörg Kristófersdóttir eru staddar á skjálftasvæðinu, en þær komu til Indónesíu 12. júlí síðastliðinn í það sem átti að vera skemmti- og dekurferð.

„Þetta er hrikalegt, við vorum alveg á skjálftasvæðinu. Lombok er alveg við eyjuna sem við erum á. Hótelið okkar er ónýtt, segir Margrét í samtali við DV, en hún veit ekki af fleiri Íslendingum á svæðinu.

Aðeins er vika síðan jarðskjálfti að stærð 6,4 reið yfir eyjuna, en þá létust 14 manns og 162 særðust. Þær vinkonur sváfu þann skjálfta hins vegar af sér.

Margrét og Katrín eru staddar 40 km frá upptökum skjálftans í dag. Segir Margrét þær ekki fá upplýsingar um neitt og ekki vita neitt hvað tekur við. Í nótt sváfu þær á ströndinni við hlið hótels þeirra, ásamt fjölda annarra, á dýnum með lak.

„Þetta er það svakalegasta sem ég hef lent í og við erum að reyna að komast af þessari eyju,“ segir Margrét, sem segir föður sinn ætla að taka við Utanríkisráðuneytið í dag.

Lombok er vinsæl meðal ferðamanna, en jarðskjálftinn fannst einnig vel á eyjunni Bali, sem er einn eftirsóttasti ferðamannastaður Indónesíu.

Mikil hræðsla greip um sig meðal heimamanna og ferðamanna þegar jarðskjálftinn og eftirskjálftar hans riðu yfir, en skjálftanum fylgdu margir eftirskjálftar, sumir þeirra yfir fimm á stærð.