Þrír þingmenn eiga íbúðir sem eru á lista sýslumanns yfir skráða heimagistingu og leigja út íbúð sína á Airbnb. Það eru þeir Ágúst Ólafur Ágústsson, þingmaður Samfylkingarinnar, Helgi Hrafn Gunnarsson, þingmaður Pírata, og Guðlaugur Þór Þórðarson utanríkisráðherra. Hvað varðar Guðlaug Þór þá er eiginkona hans, Ágústa Þóra Johnson, skráð fyrir íbúðinni.
Stundin greindi frá þessu í morgun. Á vef Airbnb má sjá umræddar íbúðir og óhætt er að segja að flestar þeirra eru ekkert slor. Hér fyrir neðan má sjá myndir innan úr íbúðunum sem gefa einstaka innsýn inn á heimili þingmanna.
Stjúpdóttir Guðlaugs Þórs Þórðarsonar utanríkisráðherra, Anna Ýr, er merkt sem gestgjafi hússins að neðan en samkvæmt fasteignaskrá er heimilið í eigu Guðlaugs og Ágústu Þóru. Eignin er staðsett í Foldahverfinu í Grafarvogi og kostar nóttin 17 þúsund krónur.
Hjónin Helgi Hrafn Gunnarsson, þingmaður Pírata, og Inga Auðbjörg Straumfjörð bjóða upp á íbúð á vef Airbnb sem kölluð er vagga kattarunnandans. Íbúðin er staðsett í Túnunum í Reykjavík. Nóttin er á 13 þúsund krónur.
Ágúst Ólafur Ágústsson, þingmaður Samfylkingarinnar, er skráður fyrir neðangreindu húsi sem er að finna í Rauðagerði í 108 Reykjavík. Húsið er um 270 fermetrar og kostar nóttin 40 þúsund krónur.
