Sema Erla Serdar, formaður flóttamannahjálparsamtakanna Solaris greinir frá því í stöðufærslu á Facebook að henni hafi verið boðið að taka þátt í pallborðsumræðum með Tommy Robinson.

Eins og kom fram í frétt DV í gær þá var von á Tommy til landsins í gær, en hann missti fyrst af flugi vegna þess að dekk sprakk á bíl hans og síðan mætti hann ekki í annað flug sökum dauðsfalls í fjölskyldunni. Ráðstefnunni var því aflýst.

Sema segir það rangt sem komið hefur fram að þeim einstaklingum sem boðið var í umræður hafi ekki séð sér fært að mæta eða ekki treyst sér í rökræður.

Þvert á móti hafi hún ekki ansað boðinu, þar sem hún hafði ekki viljað setja nafn sitt við viðburð sem hafði þann eina tilgang að ala á fordómum og hatri í garð múslima og ýta undir mismunun, sundrungu og öfgavæðingu í samfélaginu okkar

Stöðufærslu Semu Erlu má lesa í heild hér fyrir neðan:

„Í gær var greint frá því í fjölmiðlum að skipuleggjendur „ráðstefnunnar“ með múslimahataranum og öfga- og ofbeldismanninum Tommy Robinsons, sem átti að fara fram í gær, höfðu haft samband við ellefu einstaklinga í þeim tilgangi að fá þá til þess að taka þátt í pallborðsumræðum með Tommy og skoðanabræðum hans. Við fjölmiðla sagði einn skipuleggjandi að „enginn af þeim hafi séð sér fært að mæta“ og að „þau treystu sér ekki í rökræður við hann.“

Ég er ein af þeim sem haft var samband við og var boðið að taka þátt. Ég ansaði ekki boðinu. Það var ekki af því að ég treysti mér ekki í rökræður við Tommy og aðdáendahóp hans eða af því að ég sá mér ekki fært að mæta. Það var vegna þess að það hvarflaði ekki að mér í eina sekúndu að setja nafnið mitt við viðburð sem hafði þann eina tilgang að ala á fordómum og hatri í garð múslima og ýta undir mismunun, sundrungu og öfgavæðingu í samfélaginu okkar, sérstaklega hjá ungu fólki. Með því að taka þátt hefði ég gefið slíkri vitleysu sem þetta átti að vera og þeim úldnu pappakössum sem að þessu stóðu viðurkenningu sem þeir eiga alls ekki skilið.

Sem þátttakandi í þessu samfélagi ber mér siðferðisleg skylda til þess að gera allt sem ég get til þess að stuðla að því að hér séu mannréttindi virt og allir séu jafnir. Það á líka við um ykkur hin. Það gerum við m.a. með því að taka ekki þátt í viðburðum sem ala á hatri í garð minnihlutahópa í samfélaginu, að nota ekki orðræðu sem elur á fordómum og ótta í garð fólks og andmæla alltaf þegar það er gert. Þannig komum við í sameiningu í veg fyrir að hér byggist samfélag öfga og haturs!

Ást og friður!