Charles Pickett, 52 ára Bandaríkjamaður, hefur verið sakfelldur fyrir að verða fimm hjólreiðamönnum að bana. Slysið átti sér stað í júní 2016 skammt frá bænum Cooper í suðvesturhluta Michigan.

Pickett var sakfelldur fyrir morð af annarri gráðu en hann hafði innbyrt verkjalyf og önnur ávanabindandi lyf áður en hann settist undir stýri. Talið er að lyfjaneysla hans hafi átt stóran þátt í því að hann missti stjórn á bifreið sinni með fyrrgreindum afleiðingum. Alls ók hann á níu hjólreiðamenn og þar af létust fimm, sem fyrr segir; þrjár konur og tveir karlar á aldrinum 42 til 74 ára.

Pickett verður dæmdur þann 11. júní næstkomandi en hann á lífstíðarfangelsi yfir höfði sér.

Saksóknarar lýstu því sem gerðist þennan örlagaríka dag. Kom fram fyrir dómi að áður en hann ók á hjólreiðamennina hafi hann næstum verið búinn að aka á gangandi vegfaranda. „Hann hefði getað stöðvað aksturinn þar, ef hann hefði hugsað með sér að hann væri líklega ekki hæfur til að stjórna bifreið. En hann gerði það ekki, heldur hélt akstrinum áfram og ók á níu manns,“ sagði Michael Kanaby, aðstoðarsaksóknari í málinu.