Sorglegt atvik varð í Lundúnamaraþoninu um helgina þegar hinn 29 ára gamli Matt Campbell hneig niður þegar hann átti um þriðjung eftir af hlaupinu. Campbell þessi var nokkuð þekktur kokkur í Bretlandi og hafði hann getið sér gott orð í þáttunum MasterChef sem njóta talsverðra vinsælda.
Hlaupið um helgina fór fram í miklum hita, raunar þeim hæsta í sögu hlaupsins.
Campbell fékk skyndihjálp frá sjúkraflutningamönnum en var úrskurðaður látinn við komuna á sjúkrahús. Hann var öflugur hlaupari og hafði lokið maraþoni í Manchester í marsmánuði á undir þremur klukkustundum sem þykir mjög góður tími hjá áhugahlaupara.
Þá þótti Campbell frábær kokkur og hefur hann starfað fyrir veitingahús með Michelin-stjörnur í Bretlandi. Hann var valinn besti ungi kokkur ársins hjá BBC þegar hann var tvútugur.
Campbell safnaði áheitum fyrir Lundúnamaraþonið fyrir góðgerðarsamtökin Brathay Trust. Faðir hans, sem lést fyrir átján mánuðum, hafði lengi unnið fyrir samtökin og vildi Campbell heiðra minningu hans með því að hlaupa fyrir umrædd samtök.
