Félagsmenn í Félagi grunnskólakennara kolfelldu nýjan kjarasamning félagsins í atkvæðagreiðslu sem lauk í dag. Atkvæðagreiðslan var rafræn en 4.697 félagsmenn voru á kjörskrá. Alls greiddu 3.793 atkvæði eða 80,75% félagsmanna.
Já sögðu 1.128 eða 29,74% en nei sögðu 2.599 eða 68,52%. Auðir seðlar voru 66 eða 1,74%.
Félag Grunnskólakennara skrifaði undir samninginn við Samband íslenskra sveitarfélaga þann 13.mars síðastliðinn og hófst rafræn kosning þremur dögum síðar.
Helstu atriði samningsins voru launabreytingar, að horft væri frá vinnumati, undirbúningur hverrar kennslustundar væri aukinn, tími til annarra faglegra starfa minnkaður, nýr menntunarkafli og að greitt yrði fyrir sértæk verkefni.
