Bandaríski stjórnvöld hvetja þegna sína til að undirbúa jarðarförina sína og útbúa erfðaskrá áður en þeir halda til Norður-Kóreu – hafi þeir á annað borð áhuga á því.
Utanríkisráðuneyti Bandaríkjanna gaf út nýja tilskipun vegna ferðalaga til Norður-Kóreu þann 10. janúar síðastliðinn. Norður-Kórea er á hættustigi fjögur af fjórum hjá ráðuneytinu, sem þýðir að bandarískir ríkisborgarar eru hvattir til að forðast landið eins og heitan eldinn.
Bandaríkjamenn komast að vísu ekki til Norður-Kóreu með bandarísku vegabréfi einu saman, en þó er hægt að sækja um undanþágu til að komast til landsins. Metur utanríkisráðuneyti Bandaríkjanna það svo að hætta á fyrirvaralausri handtöku og fangelsun sé talsverð fyrir bandaríska ríkisborgara í Norður-Kóreu.
Eins og að framan greinir mælir ráðuneytið með því í orðsins fyllstu merkingu að þeir sem hafa áhuga á að ferðast til Norður-Kóreu grípi til ráðstafana áður; búið verði að skrásetja óskir hvað varðar jarðarför, uppeldi og umsjá barna, gæludýra og skiptingu eigna.
Eru Bandaríkjamenn minntir á það að ekkert stjórnmálasamband sé á milli ríkjanna. Norður-Kórea er ekki eina ríkið sem er á hættustigi 4 hjá bandarískum yfirvöldum. Hin ríkin eru Afganistan, Mið-Afríkulýðveldið, Íran, Írak, Líbía, Malí, Sómalíoa, Suður-Súdan, Sýrland og Jemen.