Vélsleðamaður sem var á ferð um Sierra Nevada-fjöll í norðurhluta Kaliforníu um helgina fann líkamsleifar hjónanna Marks og Brendu Richard sem saknað hafði verið síðan 17. apríl síðastliðinn.
Hjónin lögðu af stað á lítill eins hreyfils flugvél frá Truckee Tahoe-flugvellinum þennan örlagaríka dag og var ferðinni heitið á Petaluma-flugvöll í nágrenni San Francisco.
Þegar vélin skilaði sér ekki hófst leit að hjónunum og bar hún loks árangur um helgina þó skipulagðri leit hafi verið hætt fyrir tæpum mánuði.. Vélsleðamaður fann flak vélarinnar og lík hjónanna um borð. Svo virðist vera sem vélin hafi brotlent í fjalllendi í Sierra Nevada og var flakið þakið snjó þegar það fannst.
Talsverður vindur var daginn sem vélin lagði af stað. Tim Standley, lögreglufulltrúi á svæðinu, segir við AP-fréttastofuna að verksummerki bendi til þess að vélin hafi rekist á tré áður en hún brotlenti. Rannsókn á því hvað fór úrskeiðis eigi þó eftir að fara fram.
„Þetta er mikill harmleikur. Hugur okkar er hjá aðstendendum,“ segir Standley í samtali við AP-fréttastofuna.