Jón Þór Ólafsson, þingmaður Pírata, beintengir kröfur flugvirkja við ákvörðun kjararáðs fyrir um það bil ári síðan. Sú ákvörðun, sem kom rétt eftir kosningar, hækkaði laun þingmanna og annarra opinberra embættismanna umtalsvert, olli miklum usla í samfélaginu og hefur verið kærð af VR.
Í bloggfærslu í gær, 17. desember, segir Jón: „Fyrir ári síðan fengu þingmenn 45% launahækkun. Þingmenn Pírata lögðu fram frumvarp um að leiðrétta þá launahækkun í samræmi við lög eins og Davíð Oddsson gerði 1992 og Halldór Ásgrímsson 2006.“
Ástæðuna fyrir því að málið fékk ekki framgang segir hann vera svik Óla Bjarnar Kárasonar, formanns efnahags og viðskiptanefndar. Málið hafi verið svæft í nefndinni. „Ég krafðist þess á nefndarfundi að fá gesti til að geta rætt og afgreitt málið og Óli Björn lofaði því og sveik.“
Fundur þessi var haldinn 19. maí og bókunin rennir stoðum undir orð Jóns. Þar segir: „Óli Björn Kárason lagði fram eftirfarandi bókun: „Um leið og tök eru á verða gestir kallaðir fyrir nefndina í máli 189 um kjararáð og verður jafnframt litið til annarra þingmála sem bíða afgreiðslu nefndarinnar.““
Jón segir: „Nú kvartar hann yfir kröfu flugvirkja um 20% launahækkun. Já það er of brött launahækkun fyrir stöðugleika, en kannski að Óli Björn ætti að byrja á að leggja til að leiðrétta sína 45% launahækkun fyrst því hún ógnar stöðugleika, annað er hræsni. Hann má leggja fram frumvarp okkar Pírata.“