Átta ökumenn hafa undanfarna daga verið kærðir fyrir of hraðan akstur í umdæmi lögreglunnar á Suðurnesum. Sá sem hraðast ók mældist á 135 kílómetra hraða þar sem hámarkshraði er 90 kílómetrar á klukkustund.
Að sögn lögreglu bíður hans 90.000 króna fjársekt og þrír refsipunktar í ökuferilsskrá. Þá voru skráningarnúmer fjarlægð af átta bifreiðum sem ýmist voru óskoðaðar eða ótryggðar.
Þá stöðvaði lögreglan á Suðurnesjum ökumann vegna gruns um fíkniefnaakstur, en hann reyndist hafa í fórum sínum hnúajárn og poka sem innihélt amfetamín að því að talið er. Auk þess hafði hann aldrei öðlast ökuréttindi.
Farþegi sem var með honum í bílnum var með talsvert magn af kannabisefnum og tvær e – töflur í farangri sínum. Hann var einnig færður á lögreglustöð.
Áður höfðu tveir ökumenn verið handteknir vegna gruns um ölvunarakstur. Annar þeirra ók út af þar sem hann var á leið um Reykjanesbraut og hinn hafði verið sviptur ökuréttindum tvisvar.