Svona drap hann tímann – Var dæmdur til erfiðisvinnu til lífstíðar
Í síðustu viku var hinum sextíu og tveggja ára gamla Hyeon Soo Lim sleppt úr haldi í Norður-Kóreu, en þar hafði honum verið haldið föngnum frá því í febrúar 2015. Hyeon, sem er kanadískur ríkisborgari, var dæmdur til erfiðisvinnu sem hann átti að sinna allt til dánardags.
Presturinn var handtekinn og sakfelldur fyrir að hyggja á valdarán í landinu með því að breiða út kristna trú. Hann beið ekki boðanna eftir heimkomuna frá Norður-Kóreu og hélt predikun í kirkju sinni í Kanada um helgina þar sem hann deildi erfiðri reynslu sinni með áheyrendum.
Í erindi sínu sagðist hann hafa upplifað mikla einangrun og mikinn einmanaleika meðan á dvölinni í Norður-Kóreu stóð. Á meðan á dvöl hans stóð segist hann hafa borðað 2.757 máltíðir og á þeim tíma sem hann dvaldi í Norður-Kóreu hafi hann lést um tæp 23 kíló.
Verkefnin sem hann sinnti voru af ýmsum toga. Yfir vetrartímann var hann til dæmis látinn grafa djúpar holur í frosinn jarðveginn og eins og gefur að skilja var það verkefni ekki beint auðvelt. „Ég fékk kalsár á fingur og tær,“ sagði hann og bætti við að stundum hefði það tekið hann tvo daga að grafa eina holu sem var einn metri á breidd og einn metri á dýpt.
„Ég vann líka í kolageymslu þar sem ég var látinn brjóta niður kol. Á vorin og sumrin vann ég úti við, í átta tíma á dag, í miklum hitum,“ sagði hann meðal annars og bætti við að hann hafi aldrei getað áttað sig almennilega á því hvort og þá hvenær vítisvist hans myndi ljúka. Hann þurfti margsinnis á læknisaðstoð að halda og í eitt skipti þurfti hann að liggja á sjúkrahúsi í tvo mánuði.
Til að drepa tímann, milli þess sem hann vann erfiðisvinnu, las hann rúmlega hundrað bækur um Norður-Kóreu auk þess sem hann las Biblíuna á ensku einu sinni og á kóresku fimm sinnum. Hann bað til æðri máttarvalda um að hann fengi frelsi á nýjan leik.
Það var svo í síðustu viku að Lim var sleppt úr haldi og sögðu yfirvöld í Norður-Kóreu að það væri af heilsufarsástæðum. Í erindi sínu í kirkjunni í Mississauga, skammt vestur af Toronto, þakkaði hann kanadískum og sænskum yfirvöldum sem unnu að lausn hans.
Lim er við ágæta heilsu þrátt fyrir allt sem á undan er gengið og sagði fjölskylda hans í yfirlýsingu að hún væri yfir sig ánægð að hann væri laus. Hann hitti barnabarn sitt, stúlku á fyrsta aldursári, í fyrsta skipti um helgina.
Lim var í fyrstu dæmdur til dauða en dómnum var síðar breytt í erfiðisvinnu til lífstíðar. Hann var staddur í Norður-Kóreu árið 2015 vegna góðgerðastarfs sem hann hefur unnið í landinu, en áður en að handtökunni kom hafði hann ferðast til Norður-Kóreu rúmlega hundrað sinnum frá árinu 1997. Þar lét hann meðal annars gott af sér leiða á öldrunarheimili og á munaðarleysingjaheimili, en Lim hafði fjármagnað starfsemi þessara heimila að hluta.
