Kona og þrjú börn hennar fundust látin eftir eldsvoða í Angered í Gautaborg í Svíþjóð í gær. Áverkar á líkunum benda til að fólkið hafi verið myrt áður en eldur var borinn að heimili þeirra. Karlmaður hefur verið handtekinn vegna málsins en hann er grunaður um að hafa myrt fólkið.

Expressen hefur eftir Thomas Fuxborg, talsmanni lögreglunnar, að á líkunum hafi verið áverkar sem tengdust ekki brunanum. Hann vildi ekki skýra frá hvers eðlis þessir áverkar væru því það ætti aðeins lögreglan og morðinginn að vita enn sem komið er. Samt sem áður skýrðu sænskir fjölmiðlar frá því síðdegis í gær að fólkið hefði verið skorið á háls.

Konan og eitt barn voru látin þegar slökkviliðs- og lögreglumenn komu á vettvang. Tvö börn voru á lífi en með mikla áverka. Þau voru strax flutt á sjúkrahús en létust skömmu eftir komuna þangað. Sænska ríkisútvarpið segir að yngsta barnið hafi verið rúmlega árs gamalt.

Maðurinn sem var handtekinn var í stigagangi hússins sem eldurinn kom upp í en um þriggja hæða fjölbýlishús er að ræða. Sænskir fjölmiðlar segja að hann tengist konunni og börnunum fjölskyldubönum, hann er um fimmtugt.