Engu líkara en farþegar væru staddir inni í þvottavél
Óhætt er að segja að hræðsla hafi gripið um sig meðal farþega í vél AirAsia sem var á leið frá Perth í Ástralíu til Malasíu í gær. Vélarbilun gerði vart við sig í fluginu með þeim afleiðingum að vélin fór að hristast. Sögðu farþegar að það hafi engu verið líkara en að þeir væru staddir inni í þvottavél.
Meðfylgjandi er myndskeið sem var tekið inni í flugvélinni.
Um borð voru 359 manns og var vélinni snúið við aftur til Ástralíu þegar flugmenn urðu varir við bilunina.
Malik Mascerenhas, sem var farþegi um borð, sagði við Channel Seven-sjónvarpsstöðina að hann hafi óttast um líf sitt. „Við hugsuðum öll að við værum á leiðinni niður,“ sagði hann á meðan annar farþegi, Tim að nafni, sagði að margir hefðu grátið og sumir hefðu dregið fram björgunarvesti ef illa færi.
Flugstjóri vélarinnar sagði við farþega í hátalarakerfi vélarinnar að nú væri rétti tíminn til að biðja. „Ég ætla að biðja líka og við skulum vona að við komumst öll heim,“ sagði hann. Sophie Nicolas, farþegi um borð, sagði að af viðbrögðum flugstjórans að dæma hafi ástandið verið alvarlegt.
Damos Stevens, kennari sem var um borð, sagði að örvænting hefði ekki gripið um sig meðal farþega þó greina hefði mátt mikla hræðslu. Sagði hann að einhverjir hefðu þurft á aðstoð fagfólks að halda þegar vélin lenti aftur í Ástralíu.
Forsvarsmenn Air Asia segja að rannsókn muni fara fram á því hvað fór úrskeiðis. Þá hafi þeim farþegum sem það þáðu verið boðin viðeigandi aðstoð.