Vilja samt kjósa um aðild – Grikkir neikvæðastir
Pew Research Center gerði könnun í apríl í 10 af fjölmennustu Evrópusambandsríkjunum þar sem spurt var út í ýmsa þætti varðandi sambandið og fleira. Tæplega 10.000 manns svöruðu könnuninni í Þýskalandi, Frakklandi, Bretlandi, Ítalíu, Spáni, Svíþjóð, Grikklandi, Póllandi, Hollandi og Ungverjalandi.
Jákvæðni í garð sambandsins er nokkuð há, um 63% að meðaltali. Hæst í Póllandi (74%) og Þýskalandi (68%) en lægst í Grikklandi (33%). Athygli vekur að meira en helmingur Breta er jákvæður í garð sambandsins eða 54%.
Þegar spurt var hvort að fólk vildi að ríki þeirra yfirgæfi sambandið svöruðu aðeins 18% því játandi. Einungis 11% Þjóðverja og Pólverja vilja yfirgefa það en hæst var hlutfallið í Grikklandi og Ítalíu (35%).
Meirihluti Evrópubúa (53%) vill hins vegar kjósa um framtíð sína í sambandinu rétt eins og Bretar gerðu fyrir ári síðan. Spánverjar eru ákafastir í að fá þjóðaratkvæðagreiðslu (65%) en einungis í tveimur löndum, Hollandi og Ungverjalandi, var hlutfallið undið 50%
69% Evrópubúa telja að Brexit muni hafa slæm áhrif á Evrópusambandið en talsvert færri, um 55% telja það muni hafa slæm áhrif á Bretland sjálft.
Þegar spurt var út í einstök mál ber helst að nefna að meirihluti telur að flóttamannastefna sambandsins sé misheppnuð og um 74% vilja að þjóðríkin hafi meiri stjórn á innflytjendastefnu sinni. 51% vilja að þjóðríkin stýri verslunarsamningum við umheiminn og 49% telja að Þjóðverjar hafi of mikil völd innan sambandsins. Hollendingar og Svíar hafa mesta trúnna á Angelu Merkel (89%) en Grikkir langminnsta (15%).
Ólíkt Evrópusambandinu sjálfu þá fá stjórnmálaflokkar heima fyrir heilt yfir mjög slæma umsögn svarenda. Af þeim 42 stjórnmálaflokkum sem spurt var um fá einungis 5 þeirra jákvæða umsögn. Það eru Kristilegir Demókratar og Sósíaldemókratar í Þýskalandi, Flokkur Fólksins og Sósíalistaflokkurinn í Hollandi, og Demókrataflokkurinn í Svíþjóð. Verstu útreiðina fá grískir flokkar, enginn þeirra fær meira en 22%. Enginn hægri-pópúlistaflokkur fær meira en 30% jákvæðni.