Leitast við að ná fótfestu í lífinu á ný eftir áfallið
„Nú þegar málaferli í máli Elsku Birnu minnar eru að fara að hefjast þá vil ég taka fram að ég hef ekki fylgst með rannsókn málsins og ég mun ekki fylgjast með málinu. Ég óska því eftir því að fjölmiðlar virði þá ákvörðun mína og leiti ekki eftir minni skoðun varðandi það.“
Þetta segir tilkynningu frá Sigurlaugu Hreinsdóttur, móður Birnu Brjánsdóttur, sem hún birti á Facebook í morgun.
Þar biðlar Sigurlaug til fjölmiðla að virða ákvörðun sína. Um þessar mundir leitast Sigurlaug við að ná fótfestu aftur í lífinu eftir fráfall dóttur sinnar og segir að umræðan um málaferlin myndu valda sér óþægindum. Því hafi hún ákveðið að fylgjast ekki með þeim.
Thomas Møller Olsen hefur verið ákærður fyrir morðið á Birnu Brjánsdóttur. Olsen hefur verið í gæsluvarðhaldi í 11 vikur, eða síðan hann var handtekinn í janúar í aðgerðum um borð í grænlenska togaranum Polar Nanoq.
Birna Brjánsdóttir sást síðast í eftirlitsmyndavélum við Laugaveg aðfaranótt 14. janúar síðastliðinn en skilaði sér ekki heim. 22. janúar, í kjölfarið á einni umfangsmestu leit Íslandssögunnar, fannst lík Birnu við Selvogsvita.
Líkt og fram hefur komið neitar Olsen sök en hefur viðurkennt að hafa ætlað að smygla 20 kílóum af hassi frá Danmörku til Grænlands, sem fundust við leit um borð í Polar Nanoq á sínum tíma.
