„Við eigum öll að virða mikilvægi íslensks máls og reyna að tala hana og skrifa eins vel og hægt er. Við þurfum að kenna börnunum það sama. En við verðum að vera umburðarlynd og sýna þeim skilning sem koma að utan og eru að læra málið seinna en þeir sem eru fæddir og uppaldir á Íslandi. Ræðum það sem þingmenn segja frekar en með hvaða hreim þeir gera það,“

Þetta skrifar Eliza Reid forsetafrú á Facebook síðu sína í dag og vísar þar í þá miklu gagnrýni sem Nichole Leigh Mosty þingmaður Bjartrar framtíðar hefur mátt þola í vikunni, eftir að hún tjáði sig um ummæli Mikaels Torfasonar um fátækt á Íslandi.

Elíza segir frá því að hún og Guðni maður hennar hafi nýlokið opinberri ferð til Noregs. Þar gerði Guðni sitt besta til að flytja ræður og veita viðtöl á norsku þrátt fyrir að hann viðurkenni fúslega að kunnáttu hans í tungumálinu megi bæta. Eliza segir að þau hafi þegar frétt að Norðmenn hafi kunnað vel að meta að hann skyldi ekki nota ensku.

„Á Íslandi eru innflytjendur núna nær 10% mannfjöldans,“ skrifar Eliza og heldur áfram. „Ég er í hópi þeirra Íslendinga sem eru fæddir erlendis og fengu síðar íslenskt ríkisfang. Ég er stolt af því að á Alþingi sitji Íslendingar sem fæddust erlendis, í hvaða flokki sem er. Ég veit af eigin reynslu hversu erfitt það getur verið að læra nýtt tungumál á fullorðinsárum. Ég tala með hreim, beygi orð rangt, segi stundum tóma vitleysu sem fær fólk til að hlæja eða það skilur ekki neitt fyrr en ég er búin að útskýra hlutina aftur.“

Eliza segir að þótt hún þurfi ekki að flytja ræður á Alþingi komi hún reglulega fram og tali þá oftast Íslensku. „Ég geri mitt besta og sem betur fer er mér alltaf vel tekið.“