Drífa Alfreðsdóttir birti sláandi mynd af bíl Sindra í þeirri von að vitni gefi sig fram
„Hann er mjög veikur. Það er ekkert öðruvísi. Hann er heppinn að vera á lífi.“ Þetta segir Drífa Alfreðsdóttir sem er móðir piltsins sem lenti í alvarlegum árekstri á Reykjanesbrautinni, skammt austan við Kaplakrika, síðastliðinn mánudagsmorgun.
Í gærkvöldi birti Drífa mynd af bílnum sem sonur hennar var í þegar slysið varð. Líkt og sjá má á myndinni hér til hliðar þá er hann gjörónýtur.
Í tilkynningu frá lögreglunni á höfuðborgarsvæðinu síðastliðinn á mánudag var óskað eftir vitnum að umferðarslysi sem varð á Reykjanesbraut skammt austan við Kaplakrika, móts við Setbergið.
Lögreglu barst tilkynning um slysið klukkan 10.20 síðastliðinn mánudag, 20. mars. Þar rákust saman Toyota Yaris, vínrauð að lit, sem ekið var vestur Reykjanesbraut og Peugeot Partner, hvít að lit, sem ekið var austur Reykjanesbraut. Yaris bifreiðin fór yfir á rangan vegarhelming með þeim afleiðingum að árekstur varð og hafnaði hún utan vegar.
Þeir sem urðu vitni að árekstrinum eru vinsamlegast beðnir um að hafa samband við lögregluna í síma 444 1000 en einnig má senda upplýsingar í tölvupósti á netfangið 0140@lrh.is eða í einkaskilaboðum á fésbókarsíðu Lögreglunnar á höfuðborgarsvæðinu.
Drífa vill með myndbirtingunni ítreka beiðni lögreglunnar að þeir sem kunna að hafa orðið vitni að slysinu gefi sig fram við lögreglu.
Við myndina skrifar Drífa: „Við biðjum um aðstoð og deilingu. Finnum þann sem keyrði í veg fyrir Sindra. Ég efast um að sá hinn sami viti hvað gerðist“.