Verulega hefur dregið úr ferðum ferðamanna til Parísar og er ástæðan sögð ótti við hryðjuverkaárásir. Talið er að tap ferðamannaiðnaðarins vegna þess nemi nærri 150 milljörðum íslenskra króna, bara á síðasta ári. Gistinóttum frá fyrra ári fækkaði um 1,5 milljónir.

Á síðastliðnum tveimur árum hafa öfgamenn gert fjölda árása í frönsku höfuðborginni. Meðal þeirra alvarlegustu má nefna árásina á ritstjórnarskrifstofur tímaritsins Charlie Hebdo í janúar 2015 og hryðjuverkaárásir á tónleikagesti í Bataclan-leikhúsinu og víðar í nóvember sama ár en þær árásir eru mannskæðustu hryðjuverkaárásir í sögu Frakklands þar sem 219 manns létu lífið. Þá var gerð hryðjuverkaárás í Nice á Bastilludaginn 14. júlí, þjóðhátíðardag Frakka, á síðasta ári en þar var stolnum flutningabíl ekið inn í mannfjölda á leið heim eftir hátíðarhöldin. 86 manns létust í árásinni.

Samdrátturinn birtist víða í ferðamannaþjónustunni. Þannig heimsóttu fjórðungi færri Eiffel-turninn á síðasta ári en gerðu það árið áður. Í nýrri skýrslu ferðamannaráðs Parísarborgar kemur fram að þrátt fyrir verulega herta öryggisgæslu í borginni finni ferðamenn, einkum frá Evrópu og Asíu, til óöryggis. Mestur samdráttur hefur orðið í komum kínverskra og japanskra ferðamanna til Parísar. Á milli áranna 2015 og 2016 fækkaði komum Kínverja til borgarinnar um 21,5 prósent, sem samsvarar 268 þúsund ferðamönnum. Japönum fækkaði um 41,2 prósent, um 225 þúsund ferðamenn. Þá fækkaði Ítölum sem sóttu París heim um 26,1 prósent sem samsvarar 215 þúsund ferðamönnum. Þó er tiltekið í skýrslu ráðsins að samdráttur í komum ferðamanna til borgarinnar sé minni en búist var við.