Dill Restaurant á Hverfisgötu hefur fengið Michelin-stjörnu, fyrst íslenskra veitingastaða. Þetta kemur fram í tilkynningu frá Michelin Nordic.

Í tilkynningu sem Dill sendi frá sér rétt í þessu kemur fram að um sé að ræða eina stærstu viðurkenningu sem veitingastaðir um allan heim keppast um að fá. Staðurinn hefur hlotið margskonar viðurkenningar og hefur nokkrum sinnum verið valinn besti veitingastaður Íslands á listum á borð við White Guide Nordic, Nordic Prize og víðar, að því er segir í tilkynningunni. Nú bætist Michelin-stjarnan í safnið.

„Ragnar Eiríksson matreiðslumaður tók við stöðu yfirkokks í árslok 2015 þegar annar stofnenda DILL, Gunnar Karl Gíslason, flutti af landi brott til að standsetja veitngastaðinn Agern á Grand Central Terminal í New York í samstarfi við Claus Meyer. Agern fékk sína Michelin stjörnu seint á síðasta ári,“ segir í tilkynningunni. Þar segir enn fremur:

„Veitingastjóri Sæmundar í sparifötunum, Ólafur Ágústsson, tók við stöðu Gunnars og er nú starfandi framkvæmdastjóri á Sæmundi í sparifötunum og hefur yfirumsjón með DILL Restaurant. Innanhúshönnuður DILL er Hálfdán Pedersen leikmyndahönnuður sem hefur skapað sér orð víða um heim fyrir störf sín. Hann gerði leikmyndir fyrir kvikmyndir á borð The Good Heart og París Norðursins og hefur einnig hannað fyrir KEX Hostel, Geysi, Mikkeller og mörg önnur fyrirtæki.“

Þá má geta þess að Færeyingar hafa einnig hlotið sína fyrstu Michelin-stjörnu, en það var veitingastaðurinn KOKS sem varð þess heiðurs aðnjótandi.