Eftir að hafa setið í fangelsi í tæpa tvo áratugi er Inderjit Singh Reyat laus úr fangelsi. Inderjit var dæmdur fyrir aðild að hryðjuverkaárás sem grandaði flugvél Air India-flugfélagsins þann 23. júní árið 1985. Vélin var á leið frá Kanada til Indlands þegar sprengja sprakk um borð.

Flugvélin brotlenti í Atlantshafið þegar hún var í írskri landhelgi með þeim afleiðingum að allir um borð, 329 einstaklingar, létust. Af þeim sem létust voru 268 Kanadamenn, 27 Bretar, 22 Indverjar og 10 Bandaríkjamenn.

Inderjit er kanadískur ríkisborgari en fæddur og uppalinn á Indlandi. Hann var meðlimur í öfgahópi sem barðist fyrir því að Síkar fengju sitt eigið sjálfstæða ríki.

Inderjit var sakfelldur fyrir að búa til sprengjuna sem grandaði vél Air India. Þá var hann einnig sakfelldur fyrir að búa til sprengju sem sprakk á Narita-flugvelli í Japan sem varð tveimur starfsmönnum flugvallarins að bana.

Inderjit játaði sig sekann um manndráp en tveir voru sýknaðir í málinu. Er Inderjit því sá eini sem hlaut dóm vegna voðaverksins.

Að því er AFP-fréttastofan greinir var Inderjit komið fyrir í stofufangelsi í janúar síðastliðnum, en hefur hún nú fengið reynslulausn sem þýðir að hann getur um frjálst höfuð strokið. Hann verður þó áfram undir eftirliti, eða til ársins 2018 að afplánun á dómnum lýkur.