Birna Brjánsdóttir Foreldrar Birnu halda mikið upp á þessa mynd

„Okkur foreldrunum þætti vænt um ef fjölmiðlar myndu sýna okkur tillitssemi við útför Birnu á föstudaginn og taka ekki ljósmyndir á meðan jarðarförinni stendur og eftir hana.“

Þetta segja Brjánn Guðjónsson og Sigurlaug Hreinsdóttir, foreldrar Birnu Brjánsdóttur. Útför Birnu fer fram næstkomandi föstudag. Athöfnin fer fram í Hallgrímskirkju klukkan 15:00. Blóm og kransar eru vinsamlega afþakkaðir en fólki er þess í stað bent á að styrkja Landsbjörgu.

Sjá einnig: Hún elskaði lífið – Þetta er Birna

Silla og Brjánsi eins og þau eru gjarnan kölluð hafa síðustu vikur lifað sína erfiðustu daga. Þau eru þó afar þakklát öllum þeim mikla fjölda sem hafa stutt við bakið á fjölskyldunni með einum eða öðrum hætti. Þá eru bæði Silla og Brjánn þakklát þeim mikla fjölda sem minntist dóttur þeirra í miðbæ Reykjavíkur um helgina en talið er að á bilinu sex til átta þúsund manns hafi gengið niður Laugaveg en margir lögðu blóm og kerti við Laugaveg 31 þar sem Birna sást síðast á öryggismyndavélum.

„Útför dóttur okkar verður opin þannig að fólk getur mætt,“ segir Sigurlaug og undir það tekur Brjánn.

„Við sem erum náin henni viljum síður að það sé tekin mynd af okkur að syrgja hana. Það er óþægileg tilhugsun. Við öll yrðum afar þakklát ef fjölmiðlar gætu sýnt okkur þá tillitsemi að fá að kveðja Birnu án þess að séu teknar af okkur myndir. Það myndi hjálpa okkur á þessum erfiðu tímum ef það er hægt að verða við því.“