Mesta aukningin hjá embætti forseta Íslands – Borgarstjórn lækkar verulega
Traust almennings til heilbrigðiskerfisins hefur lækkað um 14% samkvæmt nýjum þjóðarpúlsi Gallup. Þannig er traust almennings til kerfisins 46% nú. Þá vekur athygli að dómskerfið lækkar einnig verulega, eða um 11%. Þá minnkar einnig traust til ríkissaksóknara og umboðsmanns Alþingis lítillega.
Borgarstjórn Reykjavíkur fellur einnig töluvert í traustkönnun Gallup og mælist með 19%, og minnkar traustið því um 12%.
Bankakerfið nýtur minnsts trausts almennings, eða 12%. Traust almennings til bankakerfisins stendur þó í stað.
Landhelgisgæslan nýtur langmests trausts almennings, eða 92% og hækkar um 11% frá síðustu könnun. Næst kemur lögreglan, sem er með 74% og lækkar um 3% þrátt fyrir fréttir af miklum erjum innanhúss.
Hástökkvari könnunarinnar er þó embætti forseta Íslands. Það hækkar um 14% og er nú í 57%.