Gunnar Júlíus Helgason geitabóndi á Vatnsleysuströnd stóð fyrir stuðningssamkomu með Ikea geitinni fyrir framan Ikea í dag. Eins eins og þekkt er var kveikt í Ikea geitinni í síðustu viku.

„Mig langaði að sýna Ikea geitinni samstöðu og vekja athygli á að geitur eru í útrýmingarhættu en það eru innan við 1000 geitur á landinu,“ segir Gunnar.

Stuðningsamkoman fór fram þar sem Ikea geitin stóð áður og vakti hún mikla athygli vegfarenda. Er þangað var Gunnar mættur ásamt stúlkunum Júlíu og Glóð, geitunum Eir og Freyju og hænunni Geit.

Júlía, Glóð og hænan Geit vilja sýna samstöðu með Ikea geitinni

Mynd: DV ehf / Sigtryggur Ari

Eina ástæðu þess að geitur eru í útrýmingarhættu telur Gunnar vera að geiturnar hafi alltaf verið tákn fátæktar. „Geitin var mjólkurkú fátæka mannsins, fólk skammaðist sín fyrir að eiga geitur,“ segir Gunnar en bætir við að tvisvar hafi fjöldi geita farið undir 100 á Íslandi en fyrir 10 árum voru þær um 500 svo það er að bætast í stofninn.

Gunnar segir að með þessari stuðningssamkomu vilji hann hvetja Ikea til að reisa geitina aftur en láta ekki undan eyðileggingamættinum. Hann hefur þó ekkert heyrt frá forsvarsmönnum Ikea varðandi uppákomuna.