„Við megum ekki mismuna neinum og gerum það ekki,“ segir Steingrímur Birgisson hjá Bílaleigu Akureyrar. „Við förum fram á alþjóðleg ökuskírteini frá Asíuþjóðum.“

Skessuhorn greinir frá því í dag að fjórar kínverskar stúlkur hafi sloppið með skrekkinn þegar þær óku bílaleigubíl út í á Hraunhafnará á Snæfellsnesi. Bíll þeirra hafi farið í loftköstum út í ána en haldist á hjólunum. „Sú sem ók hafði fengið ökuskírteinið sitt í apríl og ekki ekið mikið síðan. Kvaðst hún hafa fylgt leiðbeiningum frá „Google maps“ en samt endað út í ánni,“ segir á Skessuhorni.

Steingrímur hefur marga fjöruna sopið enda rekur hann elstu og stærstu bílaleigu landsins. Hann segir að ekki séu gerðar sérstakar kröfur til fólks aðrar en þær að það hafi gilt ökuskírteini. Hann segist ekki hafa orðið var við að Kínverjar séu verri ökumenn en aðrir. „Ég þekki mann sem var að vinna í Kína. Hann þurfti að taka alvöru próf til að fá ökuleyfi þar,“ segir Steingrímur.

Hann segir hins vegar að þeir sem búi í þéttbýlum stórborgum séu eðli málsins samkvæmt óvanir að keyra. Þannig geti Parísarbú, svo dæmi sé tekið, ekki þurft að hreyfa bíl dögum, vikum eða jafnvel mánuðum saman. „Þeir sem búa á þannig stöðum eru kannski ekki eins vanir að keyra og við, sem keyrum mörg daglega.“

Steingrímur segir að bílaleigurnar reyni eftir megni að vara fólk við helstu hættunum á íslenskum þjóðvegum. Hann bendir á að tjónum hafi fækkað mikið hlutfallslega. „Þegar við vorum með 1.000 bíla flota fyrir nokkrum árum vorum við að missa um 25 bíla á ári. Nú erum við með 4.000 og erum að missa svipaðan fjölda.“

Það er því alls ekki stór hluti sem lendir í tjóni. „Þetta er kannski áberandi í umræðunni núna því ferðamenn eru svo margir hérna núna.“