Svana Lovísa ætlaði að kaupa Lego geymsluhaus í barnaherbergið – Eintakið reyndist smærra en áætlanir gerðu ráð fyrir
„Ég mun ekki láta þetta áfall stoppa mig heldur halda leitinni áfram. Það voru ákveðin vonbrigði fyrst þegar ég opnaði kassann en síðan sprakk ég gjörsamlega úr hlátri,“ segir Svana Lovísa Kristjánsdóttir, hönnuður, sem er konan á bak við hið vinsæla hönnunar- og heimilisblogg Svartáhvítu á Trendnet.
Í morgun fór Svana Lovísa spennt á pósthúsið þar sem hennar beið pakki sem hafði tekið nokkrar vikur að berast. Um var að ræða Lego geymsluhaus sem Svana hafði keypt til að setja í barnaherbergi heimilisins. Eða það hélt Svana Lovísa að minnsta kosti. Hausarnir voru framleiddir við miklar vinsældir af Room Copenhagen en síðan stöðvaði Lego-fyrirtækið framleiðslu þeirra og núna er hausinn uppseldur um heim allan og fæst aðeins á sölusíðum á netinu. Svana Lovísa fór inn á eina slíka og keypti vinsælustu gerðina, Skull-hausinn. Fyrir þessa uppseldu hönnunarvöru greiddi hún 5.700 krónur.
„Þegar ég sótti pakkann hélt ég að ég væri hreinlega að ruglast miðað við stærðina á kassanum (stærðin var ca. tvær videospólur). Þetta hlyti að vera eitthvað annað sem ég væri búin að panta en síðan gleymt sem væri svosem alveg típískt ég,“ segir Svana Lovísa á bloggi sínu.
Í ljós kom að hausinn sem Svana Lovísa hafði keypt var ekki stærri en nöglin á litla putta hennar, sem sagt í hefðbundinni Lego-stærð. „Ég er meira að segja búin að týna honum tvisvar í morgun og veit í augnablikinu ekki hvar hann er staddur á heimilinu,“ segir Svana Lovísa, sem hefur greinilega mikinn húmor fyrir sjálfri sér.
Færslu Svönu á á trendnet.is má lesa hér