Gunnlaugur Egilsson gerði sér lítið fyrir um liðna helgi og synti yfir Miðfjörð. Á Facebook-síðu björgunarsveitarinnar Húna í Húnaþingi vestra kemur að sveitin hafi fengið skemmtilegt verkefni í hendurnar. Björgunarsveitin fylgdi sundkappanum yfir Miðfjörð.
Gunnlaugur fór frá landi á Heggstaðanesi og kom aftur að landi við Framnes. Þar tók nokkur fjöldi við honum enda nokkuð merkilegur áfangi því þetta er í fyrsta skipti sem synt hefur verið yfir Miðfjörðinn. Vegalengdin er 2.700 metrar og var hitastigið í sjónum 12 gráður. Gunnlaugur var 1.32 klst. á leiðinni og gekk sundið í alla staði mjög vel.