Leið 16 eða 18 tekur við akstrinum
Samgöngustjóri Reykjavíkur tekur undir tillögu um leiðarkerfisbreytingar hjá strætó sem felur í sér að akstri leiðar fimm í Hádegismóa verður hætt þegar haustáætlun Strætó bs. tekur gildi í ágúst.
Í minnisblaði til samgöngustjóra kemur fram að áætlaður kostnaður við akstur leiðarinnar sé fjórar milljónir króna á ári en samkvæmt farþegatalningu stígi að meðaltali aðeins fjórir um borð í vagninn aðra áttina og enginn í hina á virkum degi. Með því að hætta akstri um Hádegismóa verði leiðin sömuleiðis beinni og taki styttri tíma fyrir aðra farþega.
Í minnisblaðinu segir sömuleiðis að skynsamlegra væri að láta leið sextán aka inn í Hádegismóa í stað leiðar fimm. Samgöngustjóri tekur einnig undir þá tillögu að leið átján aki um nýjan veg, Fellsveg, sem spari tíma í akstri. Af þeim tveimur möguleikum sem lagðir voru til á akstursleið milli Úlfarsárdals og Grafarvogs, telur samgöngustjóri að leiðin um Lambhagaveg og Reynisvatnsveg sé betri, bæði sé hún styttri og beinni og tryggi þjónustu við stúdentagarða við Reynisvatnsveg.
