Píratar mældust með 38,3 prósenta fylgi í mars – Mælist nú 28,9 prósent
Fylgi Pírata mælist nú 28,9 prósent á meðan fylgi Sjálfstæðisflokksins mælist nú 27,8 prósent. Þetta kemur fram í niðurstöðum könnunar MMR á fylgi stjórnmálaflokka og stuðningi við ríkisstjórnina.
Könnunin sem um ræðir var framkvæmd dagana 22. til 26. apríl síðastliðinn og var heildarfjöldi svarenda 953 einstaklingar, 18 ára og eldri.
Píratar hafa mælst langstærsta stjórnmálaafl landsins undanfarna mánuði, en ef marka má könnun MMR hefur fylgið minnkað talsvert upp á síðkastið. Þannig mælist það nú 28,9 prósent og lækkaði um tæp 8 prósentustig frá síðustu könnun þegar það var 36,7 prósent. Þann 18.mars síðastliðinn mældist fylgi Pírata 38,3 prósent. Í niðurstöðum MMR segir að ekki mælist marktækur munur á milli Pírata og Sjálfstæðisflokks í nýjustu könnuninni.
Fylgi Sjálfstæðisflokksins hefur aftur á móti aukist og nartar flokkurinn nú í hæla Pírata. Fylgið við Sjálfstæðisflokkinn mælist nú 27,8 prósent og jókst um rúm fimm prósentustig frá síðustu könnun. Þá mælist stuðningur við ríkisstjórnina nú 32,9 prósent, eftir að hafa mælst 26 prósent í síðustu mælingu og 32,4 prósent þar áður.
Fylgi Bjartrar framtíðar minnkaði um rúmlega tvö prósentustig frá síðustu mælingu og er nú 3,4 prósent. Fylgi Vinstri grænna jókst um rúmt prósentustig og mælist nú 14 prósent. Lítil sem engin breyting varð á fylgi Samfylkingarinnar sem mælist nú með 9,7 prósenta fylgi. Þá jókst fylgi Framsóknarflokksins um 2,5 prósentustig og er nú 11,2 prósent.