„Nei,nei, það var enginn misskilningur,“ sagði Ólafur Ragnar Grímsson, forseti Íslands, í viðtali við Fréttastofu RÚV þar sem hann svaraði ásökunum Sigmundar Davíðs Gunnlaugssonar, fráfarandi forsætisráðherra, um að fundinum þeirra á milli á Bessastöðu fyrir hádegi, hefði ekki verið rétt lýst.

Sjá einnig: Sigmundur segir forseta fara með rangt mál

Hann taldi að það væri ekki rétt að munnhöggvast við fráfarandi forsætisráðherra.

„En hann mætti hér í morgun með ráðuneytisstjóra forsætisráðuneytis og ritara ríkisráðs með sér, og sá hafði skjalatösku ríkisráðs með í för,“ sagði Ólafur Ragnar samt sem áður um fund þeirra tveggja.

Eins og kunnug er þá hafnaði Ólafur Ragnar beiðni Sigmundar Davíðs um þingrof. Hélt forsetinn sérstakan blaðamannafund þar sem þetta var tilkynnt, um hádegisbilið, og tilkynnti þar þjóðinni allri um ákvörðun sína.

„Atburðarrásin var nákvæmlega eins og ég lýsti henni áðan,“ sagði Ólafur Ragnar sem sagði að það hefði aldrei áður gerst að embættismenn hefðu komið með forsætisráðherra á fund með forsetanum, og hvað þá með skjalatösku ríkisráðs í för.

„Eins og hann gaf í skyn á bloggsíðu sinni áður en hann kom til fundar við mig, tvinnaði hann saman annarsvegar þingrof og svo viðræður við formann Sjálfstæðisflokksins, og það var alveg ljóst í okkar samræðum að megintilgangurinn, að fá slíkt plagg eða fyrirheit, að það yrði notað sem vopn í viðræðum við Sjálfstæðisflokkinn,“ sagði Ólafur Ragnar.

Ólafur Ragnar segist þá hafa greint forsætisráðherranum frá því að hann teldi það ekki við hæfi að nota forsetaembættið í slíkum aflraunum.

Í lokin var forsetinn spurður hvort hann hygðist bjóða sig aftur fram í ljósi tíðinda dagsins. Ólafur Ragnar sagði ekki við hæfi að blanda slíku inn í umræðuna eins og staðan væri núna, en sagði tíðindin sýna mikilvægi forsetaembættisins þegar kæmi að lýðræðinu, þjóðarheill og þingræði.