
Maður að nafni Robert Wilson, 31 árs gamall, frá Hagerstown í nágrenni Washington, hefur verið dæmdur í 30 ára fangelsi fyrir morð af annarri gráðu en hann banaði 9 ára gömlum syni kærustu sinnar síðastliðið sumar. Drengurinn, Jack Garcia, lést af völdum höfuðáverka eftir að Robert Wilson hafði handjárnað hann og barið hann.
Misþyrmingarnar komu til vegna rifrildis um afmælistertu en Jack hafði borðað af tertunni í leyfisleysi. Móðir drengsins, Oriana Garcia, og frændi hans, Jacob Barajas, voru viðstödd og eru sökuð um hlutdeild í glæpnum. Þeirra bíður réttarhalda í vor.
Robert Wilson lýsti sig sekan af ákæru um morð af annarri gráðu og gerði dómsátt. Við það lét saksóknari niður falla ýmsar ákærur á hendur honum um ofbeldi gegn drengnum, aðrar en atvikið sem leiddi til dauða hans.