Otto Warmbier Var dæmdur til fimmtán ára erfiðisvinnu í Norður-Kóreu.

Kang Chol-hwan þekkir af eigin raun hvernig er að vera fangi í Norður-Kóreu. Á dögunum bárust fregnir af því að 21 árs gamall Bandaríkjamaður, Otto Warmbier, hefði verið dæmdur til fimmtán ára erfiðisvinnu í þessu lokaðasta ríki heims.

Kang var haldið föngnum í Yodok-fangabúðunum í Norður-Kóreu um tíu ára skeið, en hann er einn best þekkti flóttamaður Norður-Kóreu. Um reynslu hans var skrifuð bókin Aquariums of Pyongyang sem kom út árið 2005, en bókin hlaut einróma lof gagnrýnenda og varpaði ljósi á þá grimmd sem fangar eru beittir í Norður-Kóreu.

Kang sat fyrir svörum í fyrirspurnartíma á vefnum Reddit, en þar gafst notendum tækifæri á að spyrja Kang um allt milli himins og jarðar. Hann líkti Norður-Kóreu við Þýskaland nasismans og sagði að aðstæður í fangabúðum landsins væru skelfilegar. Kang, og fjölskylda hans, var handsamaður af yfirvöldum í Norður-Kóreu á níunda áratug liðinnar aldar, en afi hans var sakaður um landráð. Kang tókst að flýja til Kína árið 1992.

Í fyrirspurnartímanum lýsti hann því hvernig fangar væru vaktir klukkan fimm alla morgna og þeim þrælað út við vinnu til sólseturs. „Við vorum neyddir til að horfa á opinberar aftökur. Við vorum beittir skelfilegu ofbeldi – barðir og pyntaðir. Þetta er aðeins annað form af Auschwitz-fangabúðunum. Það er eins og þessar vinnubúðir séu afsprengi nasismans,“ sagði hann, en af svörum hans að dæma má Otto Warmbier vænta þess að erfiðir tímar bíði hans.

Þess má þó geta að mörg dæmi eru um að útlendingum, sem dæmdir hafa verið til erfiðisvinnu í Norður-Kóreu, sé sleppt úr haldi áður en fullnustu dómsins lýkur. Otto var handtekinn á leið sinni frá Norður-Kóreu í desember síðastliðnum, en í fórum hans fannst skilti sem hann hafði stolið á hóteli í höfuðborginni, Pyongyang.