Salah Abdeslam, sem grunaður er um að hafa átt stóran þátt í hryðjuverkunum í París, segist nú vilja vera framseldur til Frakklands. Hann segist ekki ætla að vinna með lögreglunni að rannsókn málsins fyrr en hann verður framseldur.

Frá þessu er greint á CNN en þar er haft eftir lögmanni Abdeslam. Abdeslam var handtekinn síðastliðinn föstudag í umfangsmiklum aðgerðum lögreglunnar í Belgíu. Daginn eftir var hann svo ákærður fyrir aðild að hryðjuverkunum í París. Abdeslam var sagður samvinnufús en hann setti þá kröfu að verða ekki framseldur til Frakklands.

Nú hefur honum snúist hugur og segist hann ekki ætla að hjálpa yfirvöldum með rannsókn sína nema að hann verði framseldur til Frakklands.

Abdeslam segist ekki hafa vitað af árásunum í Brussel, þar sem yfir 30 manns létust og yfir 200 særðust. Rannsakendur telja hins vegar afar líklegt að Abdeslam hafi átt að taka þátt í árásunum, sem gerðar voru á alþjóðaflugvellinum í Brussel og Maelbeek lestarstöðinni.