Árni Snævarr, starfsmaður Sameinuðu þjóðanna og býr í Brussel, segir það vera með ólíkindum að hryðjuverkamenn hafi tekist að gera árásir í Belgíu, þar sem ráðamenn þjóðarinnar hafi vitað að von væri á árásum.

Frá þessu greindi Árni í samtali við RÚV í morgun. Hann segir ólíðandi að yfirvöldum hafi ekki tekist að koma í veg fyrir árásirnar.

Árni bendir á að utanríkisráðherra landsins hafi komið fram í sjónvarpi um helgina og greint frá því að stjórnvöld óttuðust að hryðjuverk yrðu framin í landinu.

Sjá einnig: Hryðjuverkaárásir í Brussel: Að minnsta kosti 34 létust í árásunum

„Og það vekur auðvitað furðu að ef að menn bjuggust við hryðjuverkaárás að það skuli ekki hafa verið meiri viðbúnaður en raun ber vitni og með ólíkindum að lögreglan skuli ekki hafa getað gert nokkurn skapaðan hlut, ekki síst þegar að þeir hafa nú einn aðalhryðjuverkamanninn í haldi síðan á föstudag. Og samkvæmt þeim upplýsingum sem fengust út úr honum þá var eitthvað í gangi en samt tekst þeim ekkert að gera,“ segir Árni

Árni á þar við handtökuna á Salah Abdeslam, sem handtekinn var í umfangsmiklum aðgerðum lögreglunnar í Belgíu 18. mars síðastliðinn. Abdeslam var daginn eftir handtökuna ákærður fyrir aðild sína að hryðjuverkunum í París, þar sem 130 manns létu lífið í nóvember á síðasta ári.

Sjá einnig: Búið að ákæra Abdeslam fyrir aðild að hryðjuverkunum í París

Hér má sjá viðtalið við Árna í heild sinni.