Borgarráð samþykkti í morgun að selja Perluna og þar að auki tvo tanka undir henni sem hýsa safn og stjörnuver, fyrir samtals 3,5 milljarða króna. Fulltrúar í minnihluta ráðsins segjast styðja að Perlan verði seld en gagnrýndu meðal annars greiðslufyrirkomulagið en kaupandinn mun greiða fyrir mannvirkið í 13 árlegum greiðslum fram til 2039. Sömuleiðis gagnrýndu þeir óljós ákvæði í kaupsamningnum um mögulega sölu til kaupandans á byggingarrétti á lóð Perlunnar.
Það er fyrirtækið Perlan þróunarfélag ehf. sem kaupir Perluna en félagið hefur séð um rekstur hennar undanfarin misseri.
Í bókun fulltrúa meirihlutans í borgarráði er sölunni fagnað og lögð áhersla á þær kvaðir sem settar voru í kaupsamninginn. Samkvæmt þeim hefur Reykjavíkurborg forkaupsrétt ætli nýi eigandinn sér að selja Perluna í framtíðinni. Kvöð er einnig um að Perlan verði nýtt undir afþreyingartengda starfsemi, svo sem söfn, sýningar, veitingaþjónustu eða annað sem geri staðinn að aðlaðandi áfangastað fyrir almenning í Reykjavík. Kvöð er einnig um að börn í grunnskólum Reykjavíkurborgar geti komið í skipulagðar grunnskólaheimsóknir, í þau náttúrusöfn sem verði þar rekin, endurgjaldslaust tvisvar sinnum á skólagöngu sinni í 1. til 10. bekk.
Fulltrúar Sjálfstæðisflokksins í borgarrráði sátu hjá við afgreiðslu málsins en segjast í bókun styðja að Perlan hafi verið sett í söluferli en geri þó fyrirvara við greiðslufyrirkomulag og óljós vilyrði um byggingarheimildir og sitji því hjá við afgreiðslu málsins. Mikilvægt sé að staðinn sé vörður um hið mikilvæga útivistarsvæði Reykvíkinga sem umlyki Perluna.
Kaupverðið verður greitt þannig að 1. júní næstkomandi verða greiddir um 1,7 milljarður króna. Afgangurinn af kaupverðinu verður síðan greiddur, í alls 13 greiðslum, á sama mánaðardegi ár hvert fram til 2039 þegar síðasta greiðslan verður innt af hendi. Árið 2026 verða greiddar 500 milljónir, árið eftir 250 milljónir og loks 100 milljónir ár hvert þar til kaupverðið er greitt að fullu. Síðustu 11 greiðslurnar eru bundar byggingarvísitölu og síðustu 10 bera 4 prósent ársvexti frá 1. júní 2027 til greiðsludags. Kaupandanum er heimilt að greiða kaupverð að hluta eða í heild fyrr en tilgreint er í kaupsamningnum.
Einnig kemur fram í kaupsamningnum að verið sé að selja þrjár fasteignir, tankana tvo með safninu og stjörnuverinu og svo samkomuhús sem er þá hin eiginlega Perla en fasteignamat síðastnefndu eignarinnar er 4 milljarðar króna, 500 milljónum hærri en heildarkaupverðið fyrir eignirnar þrjár, auk lóðarinnar.
Einar Þorsteinsson fulltrúi Framsóknarflokksins í borgarráði og fyrrum borgarstjóri sagði hins vegar í sinni bókun að ánægjulegt væri að Perlan hefði verið seld fyrir uppsett verð og studdi söluna.
Þegar kemur að ákvæðum um byggingarrétt, sem Sjálfstæðismenn gera athugasemd við, þá segir í kaupsamningnum að byggingaréttur á lóðinni, sem er hluti af kaupunum, sé 1.238,5 fermetrar samkvæmt samþykktri deiliskipulagsbreytingu frá 14. september 2017. Verði samþykktur aukinn byggingarréttur síðar sem krefjist aukinna lóðarréttinda muni kaupandi greiða fyrir aukin lóðarréttindi samkvæmt samþykktri hönnun. Skuli kaupverð byggingarréttar fundið á grundvelli almennra reglna um úthlutun lóða og sölu byggingarréttar í Reykjavík, útgefnum í júní 2021. Greitt sé fyrir byggingarréttinn áður en framkvæmdir hefjast.
Það virðist nokkuð til í því að þessi ákvæði kaupsamningsins verði að teljast óljós.
Í tilkynningu frá Reykjavíkurborg sem barst í kvöld var síðan tilkynnt að Heiða Björg Hilmisdóttir, borgarstjóri, og Gunnar Gunnarsson forstjóri Perlunnar þróunarfélags ehf. muni undirrita kaupsamninginn á morgun.
