Árásarmennirnir sem hófu skothríð á Regency hótelinu í Dublin í gær voru klæddir eins og sérsveitarmenn lögreglunnar. Með dulargervinu tókst þeim að komast inn í hótelið með öflug skotvopn en þar fór fram vigtun hnefaleikakappa.

Frá þessu greina breskir miðlar í dag en þar hefur myndum af mönnum, sem tekin er skömmu áður en árásin hófst, verið birt. Þar sést að mennirnir eru klæddir í lögreglubúningum áður en þeir ráðast til atlögu.

Árásin beindist gegn glæpaforingjum sem sátu á meðal áhorfenda. Lögreglan í Dublin telur að árásarmennirnir hafi verið sex og að þrír af þeim hafi dulbúið sig sem lögreglumenn og hafið skothríð.

Í frétt MailOnline segir að tveir hafi staðið fyrir utan hótelið og gætt inngangsins á meðan einn var í sendiferðabíl sem árásarmennirnir notuðu til að komast undan.

Fram kemur að einn þeirra sem stóð við innganginn hafi verið dulbúinn sem kona. Í grein Irish Independent er haft eftir vitni sem segir að maðurinn sem dulbjó sig sem kona hafði hindrað fólk sem reyndi að flýja hótelsalinn.

Einn maður lést í árásinni og var sá þekktur glæpaforningi. Tveir aðrir særðust alvarlega í árásinni og eru þeir einnig þekktir glæpamenn í sama gengi og sá sem var myrtur.

Yfirvöld telja að árásarmennirnir séu úr öðru gengi í borginni og að um hefndarárás sé að ræða. Mikil átök hafa átt sér stað í undirheimum Dublinar síðasta árið og óttast lögreglan árásin sé upphafið af blóðugu stríði glæpagengja í borginni.

Árásin átti sér stað um klukkan hálf þrjú í gær, að staðartíma, og var hótelsalurinn var fullur af fólki þegar að árásin hófst. Árásin náðist á myndband (sjá neðst í frétt) en þar sést hversu mikil skelfing greip um sig þegar að skothvellir fóru að heyrast. Meðal annars má heyra litla stúlku kalla eftir föður sínum í mikilli geðshræringu.

Sjá einnig: Skotárás á hnefaleikavigtun í Dublin: „Pabbi hjálpaðu mér“