Gamanleikarinn Hank Azaria hefur ákveðið að stíga til hliðar sem raddleikari persónunnar Apu Nahasapeemapetilon úr þáttunum um Simpsons-fjölskylduna, en hann hefur talsett persónuna í um 28 ár.
Ákvörðunina segist hann vera mjög sáttur með í ljósi þeirrar gagnrýni sem indversk-ættaða persónan hefur hlotið í gegnum árin. Apu er sagður vera samansafn staðalmynda sem ýtir undir fordóma gagnvart fólki af sambærilegum uppruna.
Á síðasta ári var gefin út heimildarmyndin The Problem with Apu með indverska grínistanum Hari Kondabolu. Í myndinni tekur Hari viðtöl við ýmsa uppistandara og indverska gamanleikara sem segja sögur af því hversu slæm áhrif Simpsons-persónunnar hafa verið í gegnum árin, að hún skapi mjög neikvæða mynd af innflytjendum frá Indlandi eða Suðausturlöndum.
Azaria sá þessa heimildarmynd og spilaði hún stórt hlutverk í ákvörðunartöku hans. „Ég er búinn að hugsa lengi um þetta og eina sem ég get sagt er að augu mín hafa opnast”, segir Azaria í spjalli við Stephen Colbert.
„Það mikilvæga er að við hlustum á fólk frá Indlandi þegar það tjáir sína skoðun um persónu af þessu tagi og hvernig þeirra upplifun af Bandaríkjunum hefur verið.“
Azaria bætir við að honum þætti vænt um að sjá nýja handritshöfunda hjá Simpsons-teyminu, helst indverska, sem myndu flytja Apu í nýjar áttir í framtíðinni og vonar hann innilega að það rætist.
Hér að neðan má sjá stiklu fyrir heimildarmyndina The Problem with Apu.
[youtube https://www.youtube.com/watch?v=zGzvEqBvkP8]
