Mikið mæðir á Páli Matthíassyni, forstjóra Landspítalans, um þessar mundir. Því fannst DV tilvalið að lesa í tarotspil Páls á þessum COVID-tímum og athuga hvað framtíðin ber í skauti sér. Lesendum er bent á að þeir geta sjálfir dregið sér tarotspil á vef DV.
Fyrsta spilið sem kemur upp hjá Páli er 5 stafir. Bersýnilega er Páll að takast á við gríðarlega stórt vandamál og áskorun ásamt sínu fólki á Landspítalanum. Hins vegar eru einnig smávægileg vandamál að angra hann, þó að honum sé bent á að þessi litlu vandamál skipti ekki máli í stóra samhenginu. Páll er hins vegar þannig maður að hann vill ekki láta neitt ósagt og gengur því í það að friða samviskuna, hvort sem vandamálin eru stór eða lítil. Hann er að nýta færni sína á sviði heilbrigðismála og rekstrar til hins ítrasta þessa dagana og mun breyta þessari reynslu í ávinning síðar meir.
Næst er það Bikarkonungur. Oft getur Páll virkað kaldur og lokaður karakter á þá sem ekki þekkja hann. Sökum sérfræðimenntunar sinnar og stöðu hefur hann búið sér til þann persónuleika út á við og tekur þessi persónuleiki æ meira yfir. Páll er tilfinninganæmur en á oft erfitt með að tjá tilfinningar sínar og á það til að skammast sín fyrir þær. Hann þarf að minna sig á skilin á milli vinnu og einkalífs og umlykja fólkið sitt heiðarleika og hlýju á þessum erfiðu tímum þar sem vinnan gleypir hann.
Loks er það 4 sverð. Eftir að COVID-stormurinn er liðinn hjá kemur það Páli á óvart hve miklu hann hefur áorkað með skipulag, kraft og dugnað að vopni. Heimsfaraldurinn hefur tekið sinn toll og þarf Páll að hvíla sig vel og lengi eftir að stríðinu lýkur. Hann þarf að huga betur að áhugamálum sínum, en ekki síst heilsunni. Þó að líf hans einkennist af hraða þarf hann að gefa sér tíma til að staldra við og hlusta á líkamann og þarfir hans. Páll þarf að komast í snertingu við hina djúpu kyrrð en einnig velta fyrir sér hvort hann sé á þeim stað í lífinu sem hann vill vera. Hugsanlega er tíð hans á Landspítalanum lokið og eitthvað nýtt tekur við.
