Þessa dagana er talað um lítið annað en kórónuveiruna sem veldur sjúkdómnum COVID-19. Fólk horfir á fréttir, fylgist með öðrum fjölmiðlum og aflar sér upplýsinga á netinu. Á YouTube má skoða lista yfir vinsælustu myndböndin þessa stundina á Íslandi (e. trending). Efstu þrjú myndböndin snúa að kórónuveirunni og eru samtals með yfir 15 milljón áhorf.
Eitt myndbandið sýnir hvernig sýklar dreifa sér og hefur fengið hátt í átta milljón áhorf á einum sólarhring.
„Ég held að við myndum fara mun varlegar ef við myndum sjá sýklana í kringum okkur,“ segir Mark Rober, maðurinn á bak við myndbandið.
Því miður er það ekki hægt, svo að Mark ákvað að framkvæma tilraun í skólastofu nemenda í þriðja bekk. Hann notaði duft sem kallast „glow germs“ sem virkar þannig að í venjulegu dagsljósi sést duftið ekki, en í útfjólubláu ljósi sést það. Duftið færist yfir á allt sem þú snertir, svo það gefur manni ágætis hugmynd um hvernig sýklar dreifa sér.
Af öllum krökkunum voru aðeins fjórir krakkar með duftið á höndunum, án þess að vita af því.
Niðurstöður tilraunarinnar voru sláandi. Það sem skiptir mestu máli þegar kemur að sýklum er að þvo sér um hendur og ekki snerta andlitið. Mark tók það fram að það væri mjög mikilvægt að þrífa einnig hluti eins og símann. Fólk á það til að leggja frá sér símann, þvo sér um hendur og taka aftur upp símann. Síminn okkar safnar sýklum eins og hver annar hlutur eða yfirborð sem við notum mikið.
Horfðu á myndbandið hér að neðan.
Mundu að þvo þér um hendur og ekki snerta á þér andlitið.
