Ragga Nagli er klínískur heilsusálfræðingur og einkaþjálfari. Í nýrri færslu á Facebook ímyndar hún sér hvernig það væri ef maður myndi tala og umgangast barnið sitt eins og maður gerir við líkama sinn.
„Mamma má ég fá að borða ég er svangur. Ég er með hausverk. Mig svimar. Nei við borðum ekki fyrr en eftir tvo tíma. Við föstum til hádegis eins og þorri þjóðarinnar […] Mamma mig langar ekki í meira nammi. Mér er illt í maganum. Jú haltu áfram að troða í vélindað…. það er laugardagur og þarf að nýta tækifærið. Það eru heilir sex dagar þar til þú færð aftur nammi.,“ skrifar Ragga.
„Barnaverndarnefnd væri mætt á tröppurnar á núlleinni,“ segir hún.
Ragga segir að allt of margir nota hatur á eigin líkama sem eldsneyti til að hamast í rækt.
„Að þurfa að borða ákveðinn mat i þeim eina tilgangi að tálga lýsi leiðir til að á endanum springurðu á limminu og borðar yfir þig af öllu sem heitir sykur, salt, fita. Að þurfa að æfa sama hvað skrokkurinn segir þann daginn ertu að tengja neikvæðar tilfinningar við ræktina sem er yfirleitt stærsta ástæðan af hverju kortið myglar í töskunni.“
Ragga segir að ef maður byrjar að æfa og borða út frá því að elska og virða líkama sinn þá taki maður betri ákvarðanir í matarvali og velur mat sem lætur manni líða vel í líkama og sál, því maður á það skilið.
„Minntu þig á að koma fram við líkamann þinn eins og barnið þitt. Þá verður ferlið allt svo miklu auðveldara og heilsuhegðun verður ekki þvinguð heldur tekin útfrá ást og umhyggju.“
Þú getur lesið pistill Röggu í heild sinni hér að neðan.
