Þáttastjórnandinn, rithöfundurinn og fyrirsætan Padma stjórnar matreiðsluþáttunum Top Chef eins og herforingi þar sem hún fær að bragða á urmul gómsætra rétta. Meðan á tökum stendur þýðir ekkert að halda sig við gullna meðalveginn sem hljóðar upp á 2000 kaloríur á dag heldur segist hún innbyrða nær 7000-8000 því hún þarf að smakka á um 30 réttum í hverjum þætti. „Þessi kokkar eru að elda til sigurs svo þeir setja eins mikla fitu, smjör og salt í matinn og þeir geta,“ segir hin 49 ára gamla Padma sem reynir þó að borða ekki of mikið af hverum rétti svo hún geti notið þeirra allra.
Það hljómar vel að fá að úða í sig svona miklum mat en eins og flestir þarf Padma að gæta vel að mataræðinu til að halda sér í því formi sem hún vill vera í. Að tökum loknum umbyltir hún mataræðinu og byrjar á því að fá sér hálfgerðan ógeðsdrykk sem saman stendur af grænu tei, hunangi, ósætum trönuberjasafa, pakka af C-vítamíni og helling af trefjadufti. „Maður verður að þamba hann því hann er sko ekki ljúffengur, þetta er meðal fyrir líkamann sem hefur verið í ofáti. Þegar maður borðar svona mikið ætlast líkaminn til að fá áfram svona mikinn mat,“ segir Padma sem eldar einfaldan mat í eldhúsinu heima.
Hún segist oftast fá sér basmati hrísgrjón með indverska grænmetis- og baunaréttinum dal eða gulum linsubaunum. Auk þess að borða hollt hreyfir hún sig líka mikið. Hún var greind með hryggskekkju þrettán ára gömul og kírópraktorinn hennar mælti með því að hún færi í Pilates fyrir bakið. Padma segir æfingarnar hafa breytt líkamanum og styrkt hana á ótrúlegustu stöðum. „Ég er núna með rass sem ég var alls ekki með þegar ég var fyrirsæta!“