Rappdívan Nicki Minaj birti í gær ægifagrar myndir af sér með óléttubumbu á Instagram síðu sinni undir yfirskriftinni #Preggers. Þetta er fyrsta barn Nicki og eiginmanns hennar, Kenneth Petty, en sá á ansi skrautlega sögu að baki og er tvídæmdur glæpamaður.

Nicki og Kennet giftu sig í október í fyrra eftir rúmlega árs samband en saga þeirra hófst mikið fyrr. Þau eru bæði alin upp í Queens í New York og Nicki hefur talað um að þau hafi átt í samband á sínum yngri árum en farið svo hvort í sína áttina eins og gengur og gerist. Nick lagði stund á tónlist en Kenneth fetaði glæpabrautina. Árið 1995, þegar hann var á sextánda ári, var hann dæmdur fyrir að nauðga 16 ára gamalli stúlku og ógna með hnífi. Dómurinn hljóðaði upp á 18-54 mánuði og Kenneth hefur síðan verið á skrá yfir kynferðisofbeldismenn í New York. Í mars 2006 hlaut Kenneth 10 ára fangelsisdóm eftir að hafa játað að hafa skotið Lamont nokkurn Robinson til bana en sat aðeins inni í sjö ár þrátt fyrir að hafa þrálátlega brotið af sér innan veggja fangelsisins.

Kenneth skaut svo upp kollinum í lok árs 2018 þegar Nicki gerði samband þeirra lýðnum ljóst á Instagram síðu sinni. Í kjölfarið hefur hún fengið vænan skerf af gagnrýni frá fylgjendum sínum og hefur oft og tíðum komið eiginmanninum til varnar og bent á að hann hafi aðeins verið 15 ára þegar nauðgunin átti sér stað. En burtséð frá því hvað fólki finnst um það hefur Nicki ákveðið að eignast barn með sínum manni og þegar þetta er skrifað hafa rúmlega 8.400.000 manns líkað við myndirnar af óléttubumbunni.