Undanfarin ár hefur verið aukin umræða í samfélaginu um sjálfbæra tísku. Neytendur reyna að versla meira af notuðum fatnaði fyrir umhverfið og nýta fötin sín betur.
En ein móðir hefur tekið sjálfbæra tísku á annað stig. Hún hefur klæðst sama kjólnum í tuttugu ár. Kjóllinn kostaði rétt rúmlega sex þúsund krónur fyrir tuttugu árum og hefur hún klæðst honum í brúðkaupsferð sinni og í fríi á Ibiza. The Sun greinir frá.
Claire Rees, 38 ára, keypti kjólinn árið 1998. Síðan þá hefur hún klæðst kjólnum ótal mörgum sinnum.
Hún segir kjólinn sígildan og muni aldrei fara úr tísku.
„Ég keypti kjólinn þegar ég var sautján ára og hef klæðst honum svo oft á ferðalögum mínum um heiminn, og ég klæðist honum enn daginn í dag. Ég elska kjólinn því hann er svo óvenjulegur og auðvelt að klæðast honum. Þetta er hinn fullkomni sumarkjóll, en ég hef líka klæðst honum á veturna og farið þá í peysu yfir“ segir hún.
Claire hvetur fólk til að vanda kaup sína og nota fötin sín áfram.
„Það er bæði betra fyrir plánetuna og veskið þitt,“ segir hún.
