Mathilda Högberg er í hópi þeirra vinsælustu í Svíþjóð á samfélagsmiðlinum Instagram. Mathilda þessi er með 115 þúsund fylgjendur og þá heldur hún einnig úti vinsælli vefsíðu um ferðir og ferðalög.
Mathilda steig fram í viðtali við sænska blaðið Expressen og afhjúpaði eitthvað sem fylgjendum hennar var ekki kunnugt. Mathilda fæddist nefnilega karlkyns. Hún kvaðst nú stíga fram til að geta verið hún sjálf eins og hún orðar það. „Það er ekkert sem getur lýst þeirri tilfinningu að geta verið eins og ég er,“ segir Mathilda sem er 25 ára.
Þegar hún fæddist fékk hún nafnið Marcus Högberg og kvaðst hún hafa verið mjög ung að árum þegar hún komst að því að hún væri í raun kona. Hún var í grunnskóla og kveðst hafa öfundað hinar stelpurnar því þær hafi getað klætt sig hagað sér á ákveðinn hátt. Hún, sem strákur, hafi átt erfiðara með það.
Þegar Mathilda var 15 ára tók hún ákvörðun um að gangast undir kynleiðréttingaraðgerð. Hún fór til foreldra sinna og ræddi við þá um málið og segir hún að þeir hafi sýnt henni fullkominn skilning.
Í kjölfarið fór af stað ákveðið ferli þar sem hún hitti fjölmarga sálfræðinga og lækna. Þremur árum eftir að ferlið fór af stað fékk hún grænt ljós á að hún gæti gengist undir aðgerðina. Aðgerðin gekk vel og segist Mathilda hafa grátið af gleði eftir hana.
Mathilda er í ástríku sambandi með Christian Berglund og kveðst hún hafa sagt honum sögu sína á þeirra fyrsta stefnumóti. „Þetta hefur aldrei verið neitt vandamál fyrir mig,“ segir hann.
