Hanna veit samt nákvæmlega hvernig hún vill að hennar nánustu hugsi um hana þegar hennar tími er liðinn. Hanna ræddi við People.com um málið.
„Ég vil að fjölskyldan mín muni eftir mér sem brosandi, ánægðri og friðsamlegri konu sem elskaði lífið.“
Hanna er fjögurra barna móðir en hún býr í Las Vegas ásamt eiginmanni sínum Jerry Olivas. Hanna vill deyja áður en krabbbameinið verður sem verst.
„Krabbameinið mitt á eftir að veita mér langan og kvalarfullan dauða svo ég vil deyja áður en hlutirnir verða of slæmir.“
Hanna er 45 ára gömul í dag en hún var greind með krabbameinið árið 2017. Í kjölfarið voru henni gefnar lífslíkur upp á þrjú til fimm ár en hún eyddi síðustu tveimur árum í krabbameinsmeðferðum.
Læknarnir hennar hafa nú sagt henni að öll von sé úti og hún á líklegast einungis eitt ár eftir. Hanna vill njóta lífsins sem hún á eftir. Þess vegna vill hún geta ákveðið að deyja áður en sársaukinn fer að hamla henni í að lifa lífinu eins og hún vill.
„Það síðasta sem ég vil gera er að deyja, en það mun gerast hvort eð er. Ég á að geta ákveðið hvenær ég vil deyja.“
Þegar tíminn kemur mun Hanna tæma duft í glas af vatni eða safa og drekka það á meðan hún er umkringd öllum sínum nánustu. Hún mun þá sofna á nokkrum mínútum og síðan deyja á innan við klukkustund.
Þar sem líknardauði er ekki leyfilegur í Nevada þar sem þau búa þá þurfa þau að flytja til Kaliforníu áður en hún getur dáið með þessum hætti. Hanna veit ekki ennþá hvenær hún muni deyja en hún er búin að ákveða hvar hún vill gera það. Hún vill deyja á meðan hún horfir á Kyrrahafið með allri fjölskyldunni sinni.
„Vatnið er svo friðsælt. Það að deyja er hræðilegt en fjölskyldan mín mun ekki sjá mig þjást og ég mun ekki finna fyrir sársauka. Ég fer bara í friði.“
