Haraldur Johannessen ríkislögreglustjóri hefur verið undir smásjánni undanfarið og þolað mikla gagnrýni á störf sín í embætti sem hann hefur gegnt síðustu rúmlega tvo áratugi. DV ákvað að kíkja á hvað tarotspilin segja um framtíð Haraldar í embætti og kennir þar ýmissa grasa. Jafnframt er vert að minna á að lesendur geta sjálfir dregið tarotspil á vef DV.
Fyrsta spilið sem kemur upp hjá Haraldi er Sverðriddari. Riddarinn er þó ekki Haraldur sjálfur heldur góður vinur hans sem kemur honum í gegnum þá erfiðleika sem nú steðja að. Þessi vinur er kjarkaður, gáfaður og fær um að takast á við erfiðar aðstæður á jákvæðan máta. Hann er hreinskilinn og tekst opinn á við hvers kyns hindranir. Hann er til staðar fyrir Harald þegar hann þarf á því að halda. Haraldur er nefnilega í bobba og þessi vandræði skrifast hvað helst á mannleg samskipti, sem Haraldur er ekki sterkur í. Haraldur er duglegur við að segja hug sinn og hættir því ekki, en þegar hann kemst loks yfir þennan erfiða hjalla verður útkoman ekki eins og hann bjóst við.
Næst eru það 10 sverð, sem merkir að Haraldur þarf að vara sig á þeim félagsskap sem hann er í tengdum vinnunni. Haraldur er með vissar ranghugmyndir um sinn eigin frama og þarf að hlusta á hjartað – ekki heilann í þetta skiptið. Hann hefur það á tilfinningunni að fyrrnefndur félagsskapur eyðileggi fyrir honum á einhvern hátt og það endar svo að Haraldur hörfar burt úr embætti. Haraldi hefur ekki liðið vel undanfarið mitt í stormi gagnrýninnar, en þegar hann segir af sér embætti tekur nýr og betri kafli við. Hann snýr sér að einhverju allt öðru og framtíðin er björt.
Svo er það Stjarnan. Hún merkir að Haraldur finnur frið og vellíðan þegar að hann segir af sér embætti. Hann fær einnig kærkomna hvíld. Hann gerir sér loks grein fyrir að lausnir fást ekki fyrir kraft viljans heldur með því að láta undan. Það er enginn sem neyðir hann til að segja af sér – hann gerir það algjörlega upp á eigin spýtur. Síðan tekur afar jákvæð reynsla við, ný vinna á nýjum vettvangi, sem gerir það að verkum að Haraldur fær eins konar uppreisn æru. Hann byrjar einnig að hreyfa sig meira og huga að heilsunni sem verður til þess að andlegt og líkamlegt jafnvægi fæst.
