Heitasta umræðuefnið eftir Óskarsverðlaunahátíðina aðfaranótt mánudags er dúett Lady Gaga og Bradley Cooper. Halda aðdáendur þeirra því statt og stöðugt fram að þau séu ástfangin þar sem þau sungu lagið Shallow úr A Star is Born með svo mikilli innlifun.
Þá hafa einnig sprottið upp sögusagnir að kærasta Bradley, fyrirsætan Irina Shayk, sé ekki parsátt við samband hans við Lafðina. Heimildarmaður Us Weekly segir þetta hins vegar vera bull.
„Irina veit að Bradley og Gaga eru listamenn,“ segir heimildarmaðurinn. „Þetta skiptir hana engu máli. Þau voru í karakter að koma fram á Óskarnum,“ bætir hann við.
Þeir sem horfðu á Óskarinn hafa einnig séð að Irina stóð upp og klappaði eftir að Lafðin og Bradley tóku lagið. Þá faðmaði Irina söngkonuna þegar hún steig af sviðinu eftir að hafa tekið við verðlaunum fyrir besta lagið.
Bradley og Irina eiga dótturina Lea saman sem verður bráðum tveggja ára. Lafðin er hins vegar nýbúin að slíta trúlofun við Christian Carino.
