Uppskriftin af þessum guðdómlegu hafraklöttum eru algjörlega í uppáhaldi hjá mér en ég hef bakað þá margoft og þeir bara klikka ekki. Mér finnst þeir alltaf jafn góðir og það er auðvelt breyta hráefnunum eftir sínu höfði.
Þeir eru fljótlegir í gerð og bakstri, geymast í um 5-7 daga í kæli og er ansi ljúft að eiga nokkur stykki inn í frysti ef að heimsókn ber að garði eða ef þig langar bara í ansans snarl.
Eins og þið sem fylgið mér á snapchat vitið, þá lifi ég fyrir mat, og snarl/millimál er ekki eitthvað sem skal vanmeta. Pirrað fólk (lesist: ég) er fólk sem gleymdi að fá sér snarl. Punktur.
– 3 vel þroskaðir bananar
– ¼ bolli eplamauk án viðbætts sykurs
– 2 tsk vanillu dropar
– 2 og ¼ bolli hafrar
– ½ tsk matarsódi
– ½ tsk lyftiduft
– 1 tsk kanill
– ¼ tsk salt
– 1/3 bolli hnetur, fræ eða þurrkaðir ávextir
Hér getið þið sett það sem ykkur lystir en ég vel yfirleitt bara það sem er til í skápnum hverju sinni. Í þetta sinn setti ég pekan hnetur, þurrkuð trönuber og sólblómafræ. Einnig er mjög gott að eiga smá aukalega af fræjum til að strá yfir klattana áður en þeir fara í ofninn.
Hafrarnir eru malaðir í blandara og hrærðir við matarsóda, lyftiduft, kanil og salt.
Bananar, eplamauk og vanilludropar eru stappaðir saman í hrærivél eða með blandara (megið líka nota bara gaffal ef þið eruð badass).
Þurrefnum er blandað við blautefnin og loks hnetum og fræjum hrært út í með sleif.
Deiginu er komið fyrir í bökunarformi (mitt var 20x20x5cm) og fræjum stráð yfir ef þið kjósið þá leið. Klattarnir eru bakaðir við 180°C í 15 mín. Leyfið þeim að kólna áður en þið skerið þá niður í þá stærð sem hentar ykkur.
