„Stelpur eru sumar svo óánægðar með líkamspart, sem er ekki einu sinni sjáanlegur utan á þeim, að þær fara og láta skera í hann. Svo hann sé líkari sléttri og symmetrískri klámfyrirmyndinni, sem er ekki einu sinni presenteruð fyrir stelpurnar sjálfar, heldur er hún fjöldaframleidd fyrir stráka. Ógeðslega ergilegt,“ segir Kristín Ólafsdóttir í Bakþanka Fréttablaðsins í dag.
Kristín segir að umfjöllun BBC um breskar stúlkur sem leita æ oftar til lýtalækna vegna þess að þær þola ekki píkuna á sér sé kveikjan að pistlinum. „Þær eru fimmtán ára og þær hata á sér píkuna. Sem er auðvitað helber sturlun,“ skrifar Kristín.
Hún segir að þessi firnasterka haturstenging sem konur hafa við líkama sinn sé ekkert tiltökumál. „Það er ekki sjokkerandi að heyra konu segja að hún hati á sér lærin. Eða að hún þoli ekki á sér nefið. Eða að brjóstin verði aldrei söm eftir að börnin fæddust. Og hún hatar þessi brjóst, „guð, ég hata á mér brjóstin,” segir hún við vinkonur sínar og þær sýna henni skilning vegna þess að þær hata líka eitthvað í sér,“ skrifar Kristín.
Hún segir að vegna þessa sé mikilvægt að krefja samfélagið um alls konar birtingarmyndir. „Það liggur náttúrulega beint við að hata þegar birtingarmyndir kvenlíkamans eru einhvers konar fantasíu-sápukúluútgáfur af honum. Þegar maður hefur enga píku til samanburðar við sína eigin nema nákvæmlega þessa einu sem klámmyndaframleiðendur halda að strákar vilji sjá,“ skrifar Kristín.
