Leikritið dregur innblástur sinn frá norsku sjónvarpsþáttunum SKAM sem njóta gríðarlegra vinsælda hér á landi, en er á engan hátt nákvæmlega eins og þættirnir. Dominique Gyða Sigrúnardóttir semur handrit og leikstýrir, Daði Freyr Pétursson sér um tónlistarstjórn og Kjartan Darri Kjartansson um ljósahönnun.
Leikritið fjallar um þetta tímabil sem við þekkjum öll svo vel, unglingsárin þegar við mótumst frá barni yfir í fullorðinn einstakling og þau vandamál sem koma upp á þeim árum, ásamt því góða sem gerist. Vinátta og vandræði, stríðni, afskipt ungmenni, uppteknir foreldrar, ást og hrifning, gagnkvæm ást og höfnun, kynlíf og getnaðarvarnir, áfengi, leyndarmál, snjallsímar, tónlist, kvikmyndir og sjónvarpsþættir er bara hluti af því sem boðið er upp á á kvöldstund í Verzló.
Forsýning var haldin 1. nóvember síðastliðinn og góðum gestum boðið. Það var með nokkurri eftirvæntingu sem ég steig aftur á marmarann í Verzló eftir tæplega 30 ára fjarveru, en barnsfaðir minn og vinkonur voru í Verzló á sínum tíma og ég því oft daglegur gestur þar, auk þess sem ég sá þá nokkrar sýningar skólans.
Það er skömm að segja frá því að segja að ég hef ekki enn þá séð norsku þættina SKAM og því get ég ekki sagt til um hvort að leikritið sækir fleira í þá en innblásturinn að leikritinu. En það er hins vegar engin skömm að sýningu Verzló, heldur er um að ræða afskaplega skemmtilega og vel heppnaða sýningu. Leikararnir tíu eru góður hópur og fá þau öll sinn tíma í sviðsljósinu þó að mis mikill sé. Er alveg ljóst að einhver þeirra munu eiga góða spretti í leikhúsum borgarinnar ef þau velja sér leiklistina sem ævistarf. Að öðrum ólöstuðum þá standa þeir Kristófer Baldur Sverrisson, sem nýneminn Breki, og Tómas Arnar Þorláksson, sem eldri neminn og töffari skólans, Eysteinn, upp úr. Ella María Georgsdóttir, sem Kata, og Pétur Már Sigurðsson, sem Darri, eru líka einstaklega skemmtileg, en þau eru bestu vinir og gera allt saman sem kærustupör gera, en eru ekki kærustupar.
„Ef maður gæti gefið sjálfum sér góð ráð, þá þyrfti maður enga vini“ er setning sem kemur fram í upphafi sýningarinnar og það er tilvalið að hóa í einn góðan vin, eða fleiri, og eiga góða kvöldstund í Verzló á SKÖMM.
