Í öllum almennilegum eldhúsum ætti að vera til ólífuolía, salt og svartur pipar, eitthvað af indverskum kryddum, hveiti og eitthvað af þurrum jurtakryddum, til dæmis minta, oregano og rósmarín, smá sykur og sítrónusafi í formi sítrónu eða bara í flösku. Þessi innihaldsefni eru þess vegna ekki talin með – því þau eru álíka sjálfsögð og hnífar eða diskar.

Ef svanga gesti ber að garði er nú alltaf gaman að geta vippað upp fljótlegum rétt í eldhúsinu án þess að þurfa að fara út í búð. Einfaldur pastaréttur eða hummus með brauði getur bragðast eins og herramannsmatur í góðum félagsskap. Svo er fátt betra en að elda fyrir einhvern – það sýnir vináttu og hlýju á svo fallegan hátt.

Ef þú lumar á þessum hráefnum til viðbótar, áttu alltaf að geta skellt í huggulega máltíð:

1. Niðursoðnir tómatar
2. Laukur/hvítlaukur
3. Gulrót eða sellerí eða bæði
4. Þurrt pasta
5. Parmesanostur
6. Kjúklingabaunir
7. Rauðar linsubaunir
8. Kókosmjólk
9. Tahini
10. Frosið flatbrauð (til dæmis pítubrauð eða polarbrauð)
    Ef þú elskar mið-austurlenskan mat, bjóddu þá upp á hummus með brauði:

1 dós kjúklingabaunir
Safi úr tæpri sítrónu
1 hvítlauksrif
2 msk tahini
Smá chilli eða cayenne pipar
Salt
Aðferð:
Helltu helming af baunasafanum af, skelltu öllu í matvinnsluvél og blastaðu í góða stund. Smakkaðu til. Settu fallega á disk, búðu til litla dæld allan hringinn og helltu ólífuolíu í hana. Ef þú lumar á sumac er fallegt að strá svolitlu yfir. Þetta er svo snætt með frosna brauðinu sem þú ert búin/n að hita örlítið í ofni.

Ef þú elskar ítalskan mat, bjóddu þá upp á einfalt og heiðarlegt spaghettí:

1 dós niðursoðnir tómatar
Laukur/hvítlaukur
Gulrót eða sellerí eða bæði
Salt, pipar, sykur og etv. þurrkrydd eins og oregano eða rósmarín
Spaghettí
Parmesanostur
Aðferð:
Steiktu niðursoðinn lauk og hvítlauk við miðlungshita í dálítilli ólífuolíu. Bættu smátt skorinni gulrót/sellerí við og steiktu góða stund í viðbót. Helltu tómatdósinni út í, bættu við hálfri dós af vatni. Sjóddu dálitla stund. Bættu við kryddum og sykri. Smakkaðu til! Endaðu á að mauka sósuna með töfrasprota.
Berðu fram með spaghettí sem er soðið eftir kúnstarinnar reglum og hafðu nóg af rifnum osti til að strá yfir.

Ef þú elskar indverskan mat, búðu þá til einfaldan linsubaunarétt (dal):

1 bolli rauðar linsubaunir
1 dós kókosmjólk
Laukur/hvitlaukur
Sítróna/sítrónusafi
Gulrót eða sellerí eða bæði
Aðferð:
Steiktu grænmetið við miðlungshita í smá olíu. Þegar það er vel mjúkt fer bolli af linsum og 1.5 bollar af vatni í pottinn. Láttu malla í 10 mínútur. Bættu kókosmjólk og dálitlu af sítrónusafa út í. Kryddaðu með salti, garam masala og mintu. Hér er málið að sýna hugrekki og smakka til. Berðu fram með hituðu flatbrauði og hrísgrjónum.